又有暴徒被放生？前年黑暴期间，警方喺湾仔一个单位搜出大量示威常用物品，以及可以製造汽油弹嘅材料，现场六人被捕，被控串谋暴动罪同埋一项串谋参与非法集结成为交替控罪。不过，区域法院法官沈小民（小图）近日竟然裁定呢六个人全部罪名不成立。

　　沈官畀出嚟嘅理由係，涉案单位内搜出嘅物品都有“合法用途”，唔可以视作攻击性武器，反而质疑警方“为何到该单位时没有发现任何製作品及半製成品？”佢又举例形容，“有如锁匠会开锁但不一定会爆窃，穿黑衣及有相关装备不一定是暴力示威者”。

　　睇到呢度，大家係咪觉得似曾相识？无错，沈官去年审理一宗湾仔暴动案时就讲过呢番说话，话去暴动现场未必係暴徒，可能係为咗亲身见证历史时刻；带备防护装备亦无可厚非，因为唔能够保证唔会遇到暴力场面；即使被捕前逃跑亦未必係畏罪潜逃，可能係响应警方警告而离开……当时就有网民形容沈官似被告嘅辩护律师多过似法官。

　　市民促律政司上诉到底

　　市民Ellie Chan喺网上留言话：“如果在一间屋内搜到用来製造毒品材料，都唔犯法啦，因为仲未製成毒品。”有市民就寄希望於律政司，Rick Yu话：“律政司，广大市民对你有合理期望，请彰显公义，上诉到底！”